Ранитидин-АКОС (0.3 г)

• русский
• қазақша

• Скачать инструкцию медикамента

Саудалық атауы

Ранитидин-АКОС

Халықаралық патенттелмеген атауы

Ранитидин

Дәрілік түрі

Қабықпен қапталған 0,15 г және 0,3 г таблеткалар

Құрамы

Бір таблетканың құрамында

белсенді зат – 150 мг, 300 мг ранитидин гидрохлориді (ранитидинге шаққанда)

қосымша заттар: лактоза, микрокристалды целлюлоза, повидон, кальций стеараты, жүгері крахмалы,

қабық құрамы: гипромеллоза, макрогол, тропеолин 0, титанның қостотығы, пропиленгликоль, тальк

Сипаттамасы

Дөңгелек, екі беті дөңес, сары түсті қабықпен қапталған таблеткалар.

Фармакотерапиялық тобы

Ойық жараға қарсы препараттар және гастроэзофагеальді рефлюксті (GORD) емдеуге арналған препараттар. Н2- гистамин рецепторларының бөгегіштері.

АТЖ коды А02ВА02

Фармакологиялық қасиеттері

Фармакокинетикасы

Жылдам сіңеді, ас ішу сіңірілу дәрежесіне әсер етпейді. Биожетімділігі – 50%. Ең жоғары концентрациясы - 150 мг ранитидин; ең жоғары концентрациясына жету үшін қажет уақыт – 2-3 сағат. Плазма ақуыздарымен байланысы – 15%. Гематоэнцефалдық кедергі арқылы нашар енеді; плаценталық кедергі арқылы және ана сүтіне өтеді (әйелдің емшек сүтіндегі концентрациясы, плазмадағыдан гөрі, лактация кезеңінде жоғары). Бауырда дезметилранитидиннің және ранитидиннің S-тотығының түзілуімен болымсыз метаболизденеді. Бауыр арқылы «алғашқы өту» әсерін иеленеді. Шығарылу дәрежесі мен жылдамдығы бауыр жай-күйіне аз тәуелденеді. Қалыпты креатинин клиренсінде (КК) жартылай шығарылу кезеңі – 2,5 сағат, 20-30 мл/мин КК кезінде – 8-9 сағат.

60-70%-ы бүйрекпен (35%-ы негізінен өзгермеген күйде) және ішек арқылы шығарылады.

Фармакодинамикасы

II буынның Н2-гистамин рецепторларының бөгегіші. Әсер ету механизмі асқазан шырышты қабығының париетальді жасушалар жарғақшаларының Н2-гистамин рецепторларын бөгеумен байланысты. Күндізгі және түнгі, сондай-ақ базальді әрі көтермеленген НCl сөлінісін бәсеңдетеді, гормондар мен биогенді көтермелегіштердің (гастрин, гистамин, ацетилхолин, пентагастрин, кофеин) әсер етуімен және тағамдық жүктемеден асқазанның созылуынан туындайтын асқазан сөлінің көлемін азайтады. Р450 цитохромымен байланысты «бауыр» ферменттерін мүлде бәсеңдетпестен, асқазан сөліндегі НCl мөлшерін азайтады, плазмадағы гастрин концентрациясына, шырыш өндірілуіне ықпал етпейді. Пепсиннің белсенділігін төмендетеді.

Қан сарысуындағы Ca2+ концентрациясына ықпалы жоқ. Ішу арқылы қабылдағаннан кейін емдік дозаларда пролактин концентрациясына әсер етпейді (100 мг және одан көп дозада ранитидинді көктамыр ішіне енгізгеннен кейін қан сарысуындағы пролактин концентрациясының өткінші мардымсыз жоғарылауы мүмкін).

Гипофиз гормондарының: гонадотропиннің, тиреотропты гормонның және соматотропты гормонның шығарылуына әсер етпейді. Кортизол, альдостерон, андрогендер немесе эстрогендер концентрациясына, сперматозоидтар қозғалғыштығына, шәһует мөлшері мен құрамына ықпалы жоқ, сондай-ақ андрогенге қарсы әсерін тигізбейді.

Вазопрессиннің босап шығуын әлсіретуі мүмкін.

Асқазан шырышты қабығының қорғаныш механизмдерін күшейтеді және асқазан шырышының түзілуін ұлғайту, ондағы гликопротеиндер мөлшері, асқазан шырышты қабығымен гидрокарбонат сөлінісін көтермелеу, ондағы Pg эндогенді синтезі мен регенерация жылдамдығы арқылы оның НCl әсер етуімен байланысты зақымдарының жазылуына (соның ішінде асқазан-ішек қан кетулерінің тоқтауына және стрестен болатын ойық жараларының тыртықтануына) ықпал етеді. 150 мг дозада 8-12 сағат ішінде асқазан сөлінің бөлінуін бәсеңдетеді. Микросомалық ферменттерді (циметидиннен әлсіздеу) тежейді.

Қолданылуы

• емдеу және алдын алу – асқазанның және 12-елі ішектің ойық жаралы ауруы

• ҚҚСП-гастропатия

• қыжылдау (гиперхлоргидриямен байланысты)

• асқазан сөлінің асқын сөлінісі, симптоматикалық ойық жаралар

• асқазан-ішек жолының стрестен болатын ойық жаралары

• эрозиялық эзофагит, рефлюкс-эзофагит

• Золлингер-Эллисон синдромы

• жүйелі мастоцитоз

• полиэндокринді аденоматоз

• ас ішумен байланысты немесе ұйқыны бұзатын эпигастрийлік немесе төс артындағы ауырулармен сипатталатын, бірақ жоғарыда аталған ахуалдардан болмайтын диспепсия

• асқазан-ішек жолының жоғарғы бөліктерінен қан кетулерді емдеу

• операциядан кейінгі кезеңде асқазаннан қан кету қайталануларының алдын алу

• жалпы жансыздандырумен операция жүргізілетін науқастарда асқазан сөлі аспирациясының алдын алу (Мендельсон синдромы)

• аспирациялық пневмонит (алдын алу)

• ревматоидтық артрит (қосымша ем ретінде)

Қолдану тәсілі және дозалары

Ранитидин-АКОС, ас ішуге байланыссыз, аздаған су мөлшерімен іше отырып, шайналмай қабылданады. Ересектер және 14 жастан асқан балалар:

Асқазан мен 12-елі ішектің ойық жарасы (өршу фазасындағы), операциядан кейінгі ойық жаралар – 4-8 апта бойы тәулігіне 2 рет 150 мг немесе түнге қарай 300 мг. Осы мерзім ішінде ойық жаралары тыртықтанбаған емделушілер кейінгі 4 апта бойына емдеуді жалғастырады.

Қайталанулардың алдын алу үшін – түнге қарай 150 мг; темекі тартатын емделушілер үшін – түнге қарай 300 мг.

ҚҚСП-гастропатия – 8-12 апта бойы тәулігіне 2 рет 150 мг немесе түнге қарай 300 мг; алдын алу үшін – тәулігіне 2 рет 150 мг-ден.

Эрозиялық рефлюкс-эзофагит – 8 апта бойы тәулігіне 2 рет 150 мг немесе түнге қарай 300 мг; қажет болса, емдеу курсын 12 аптаға дейін ұзартады. Рефлюкс-эзофагит ауырлығының II-III дәрежесінде дозаны 12 апта бойы 4 қабылдау үшін тәулігіне 600 мг-ге дейін көбейтеді. Ұзаққа созылатын алдын алу емінде – тәулігіне 2 рет 150 мг.

Золлингер-Эллисон синдромында – тәулігіне 3 рет бастапқы 150 мг доза; қажет болғанда – тәулігіне 6 г-ге дейін.

Созылмалы диспепсия көріністерінде– 6 апта бойы тәулігіне 2 рет 150 мг-ден.

Бүйрек қызметі бұзылған емделушілерге дозалау режимін реттеу талап етіледі. Минутына 50 мл-ден аз КК – тәулігіне 150 мг. Бауыр қызметінің қатарлас бұзылуы болғанда дозаны әріқарай азайту қажет болуы мүмкін.

Гемодиализде жүрген науқастарға кезекті дозаны гемодиализ аяқталғаннан кейін бірден тағайындайды.

Жағымсыз әсерлері

Кейде

- жүрек айну, ауыздың кеберсуі, іш қату, диарея, іштің ауыруы, сарғаю, «бауыр» трансаминазалары белсенділігінің жоғарылауы

- бас ауыру, бас айналу, гипертермия, қатты қажу, ұйқышылдық, ұйқысыздық, эмоциялық ауытқымалылық, мазасыздық, үрей, депрессия, жүйкенің тозуы

Сирек

- гепатоцеллюлярлы, холестатикалық немесе аралас гепатит, жедел панкреатит

- лейкопения, тромбоцитопения, агранулоцитоз, панцитопения, нейтропения, иммундық гемолитикалық және апластикалық анемия

- артериялық қысымның төмендеуі; брадикардия, тахикардия, васкулит, аритмия, атриовентрикулярлық (AV) бөгеліс

- сананың шатасуы, құлақтың шуылдауы, ашушаңдық, елестеулер (негізінен егде емделушілерде және ауыр науқастарда), еріктен тыс қимыл-әрекеттер

- көру арқылы қабылдаудың анық болмауы, аккомодация парезі

- артралгия, миалгия

- гиперпролактинемия, гинекомастия, аменорея, потенцияның және/немесе либидоның төмендеуі

- аллергиялық реакциялар: сирек – ангионевротикалық ісіну, анафилактикалық шок, мультиформалы экссудативтік эритема, соның ішінде Стивенс-Джонсон синдромы, эксфолиативті дерматит, уытты эпидермалық некролиз, кейде – есекжем, тері бөртпесі, қышыма, бронх түйілуі

- басқа да: алопеция

Қолдануға болмайтын жағдайлар

- ранитидинге және қосымша заттарға жоғары сезімталдық

- жүктілік және лактация кезеңі

- 14 жасқа дейінгі балалар жасы

Дәрілермен өзара әрекеттесуі

«Концентрация-уақыт» қисығы астындағы ауданды (AUC) және қан сарысуындағы метопролол концентрациясын (тиісінше 80 және 50%) ұлғайтады, осы орайда метопрололдың жартылай шығарылу кезеңі 4,4-тен 6,5 сағатқа дейін ұзарады.

Итраконазол мен кетоконазолдың сіңуін азайтады.

Бауырдағы феназон, аминофеназон, диазепам, гексобарбитал, пропранолол, метопролол, нифедипин, варфарин, диазепам, лидокаин, фенитоин, теофиллин, аминофиллин, тікелей емес антикоагулянттар, глипизид, буформин, метронидазол, кальций өзектерінің «баяу» бөгегіштерінің (КӨББ) метаболизмін бәсеңдетеді.

Прокаинамид концентрациясын жоғарылатады.

Антацидтер, сукральфат ранитидиннің сіңірілуін баяулатады (бір мезгілде қолданылған антацидтер мен ранитидинді қабылдау арасындағы үзіліс 1-2 сағаттан кем болмауға тиіс).

Сүйек кемігін бәсеңдететін дәрілік заттар нейтропения қатерін арттырады.

Айрықша нұсқаулар

Сақтықпен бүйрек және/немесе бауыр жеткіліксіздігінде, энцефалопатиялы бауыр циррозында (сыртартқысында), жедел порфирияда (соның ішінде сыртартқыдағы), иммунитеттің әлсіреуінде қолданылады.

12-елі ішектің ойық жаралы ауруының белгілері 1-2 апта ішінде жоғалады, эндоскопиялық немесе рентгендік зерттеулер деректерімен тыртықтануы расталғанша емді жалғастырған жөн.

Асқазан карциномасымен байланысты белгілер бүркемеленуі мүмкін, сондықтан емдеуді бастар алдында қатерлі жаңа түзілімдердің болуын жоққа шығару қажет.

Ранитидинді күрт тоқтату дұрыс емес («рикошет» синдромы).

Стресс жағдайларында әлсіреген науқастарды ұзақ уақыт емдегенде асқазан бактериялы зақымданып, әріқарай жұқпаның таралуы ықтимал.

Н2-гистамин рецепторларының бөгегіштерін, олардың сіңуінің едәуір азаюын болдырмау үшін, итраконазолды немесе кетоконазолды қабылдағаннан кейін 2 сағаттан соң қабылдау керек.

Несептегі ақуызға сынама жүргізгенде жалған оң реакцияның себебі болуы мүмкін.

Қан сарысуындағы креатинин, гамма-глутаминтрансфераза (ГГТ) және трансаминаза деңгейін жоғарылатады.

Асқазанның қышқыл түзу қызметіне пентагастрин мен гистаминнің әсеріне кері әрекет етеді, сондықтан тестінің алдындағы 24 сағат ішінде оны қолдану ұсынылмайды.

Гистаминге терінің реакциясын бәсеңдетіп, осылайша, жалған теріс нәтижелерге әкеледі (шұғыл түрдегі аллергиялық тері реакциясын анықтауға арналған диагностикалық тері сынамаларын жүргізу алдында препаратты қолдануды тоқтату ұсынылады).

Препараттың асқазандағы түнгі қышқыл бөлінуін тежеу тиімділігі шылым шегу нәтижесінде төмендеп кетеді.

Емдеу кезінде асқазан шырышты қабығының тітіркенуін туғызатын азық-түлік өнімдерін, сусындар мен басқа дәрілік заттарды тұтынудан аулақ болу керек.

Жақсару болмаған кезде дәрігерден кеңес алу қажет.

Дәрілік заттың көлік құралдарын немесе қауіптілігі зор механизмдерді басқару қабілетіне әсер ету ерекшеліктері

Емделу кезеңінде автокөлік жүргізуді және жоғары зейін шоғырландыру мен психомоторлық реакциялар жеделдігін талап ететін зор қауіпті қызмет түрлерімен айналысуды қоя тұру керек, өйткені, әсіресе, бастапқы дозаны қабылдағаннан кейін бас айналуы мүмкін.

Дәрігердің тағайындауымен қолданылады.

Артық дозаланғанда

Белгілері – құрысулар, брадикардия, қарынша аритмиялары.

Емі – белгісіне қарай. Ішу арқылы қабылдаған кезде құсуды туындату немесе/және асқазанды шаю көрсетілген. Құрысулар дамығанда – к/і диазепам, брадикардияда – атропин, қарыншалық аритмияларда – лидокаин. Гемодиализ тиімді.

Шығарылу түрі және қаптамасы

10 таблеткадан поливинилхлоридті үлбірден және баспалы лакталған алюминий фольгадан жасалған пішінді ұяшықты қаптамаға салады.

2 пішінді ұяшықты қаптама медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салады.

Сақтау шарттары

Құрғақ, жарықтан қорғалған жерде, 25С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

«Синтез» ААҚ

Ресей Федерациясы, 640008, Қорған қ-сы, Конституция даңғылы, 7.

тел./факс: (3522) 48-16-89

Тіркеу куәлігі иесінің атауы және елі

«Синтез» ААҚ, Ресей Федерациясы

Қазақстан Республикасы аумағында тұтынушылардан өнім сапасына қатысты шағымдарды қабылдайтын ұйымның мекенжайы «СТОФАРМ» ЖШС, 000100, Қазақстан Республикасы,

Қостанай облысы, Қостанай қ-сы, Орал к-сі, 14

тел.: 714 228 01 79